அருள்மிகு அத்தனூர் அம்மன் துணை (பத்ரகாளி அம்மன்) பாரக்கல்புதூர்

இராசிபுரம் நாடு விழியன் குல கொங்கு நாட்டு கவுண்டர்களின் குலக்கோவில்

ஆதியில் விழியன் குலத்தார் காங்கேய நாட்டில் "பரஞ்சேர்வழி' என்ற ஊரில் காணி பெற்று வாழ்ந்துள்ளனர். அவ்வூரில் உள்ள கரிய காளியம்மன் அவர்களுடைய குல தெய்வமாகும். அக்கோவில் விழியன் குலத்தாருடைய குதிரை உள்ளது. பின்னர் இராசிபுரம் பகுதியில் குடியேறினர். அத்தனூரில் சிறிய கோவில் கட்டி வழிபட்டு வந்தனர்.1331 ஆம் ஆண்டு அவ்விடத்தில் பெரிய புதிய குலக் கோவில் கட்டினர். அந்தகோயிலுக்கு கும்பாபிஷேகம் செய்து கொடுக்கும்படி குல குருவிற்கு எழுதிய ஓலையில் இராசிபுரம் விழியன் குலம் நாட்டு ரங்கப்ப கவுண்டர், ஆலந்தார் வேலப்பக்கவுண்டர் குமாரர் கைலாசக் கவுண்டர் ஆகியவர்கள் பெயர்கள் குறிப்பிடப்பட்டுள்ளது. கும்பாபிஷேகம் வைகாசி மாதம் 15 ஆம் நாள் நடைபெற்றது. அம்மனின் பெயர் "பத்ரகாளி" என்பதாகும். வழக்தில் "அத்தனூர் அம்மன்" என்றே பொதுவாக அழைக்கப்பட்டது.

அத்தனூர் அம்மன் கோவில் மோடமங்கலம், சித்தளந்தூர், இலுப்புளி, கருமாபுரம், வட்டூர், கூத்தாநத்தம், கூடலூர், இரணாபுரம், பாலமேடு, எழுமாத்தூர், பிடாரியூர், காகம், கோயம்புத்தூரில் கணபதி ஆகிய ஊர்களில் உள்ளன. அம்மன் கருவறையில் எப்பொழுதும் அணையாத "நந்தா விளக்கு" எரிந்து கொண்டிருக்கும். கொடிக் கம்பத்திற்கு அருகில் பாச்சலூரான், செண்பகராயன், துலுக்கண்ணன், ஆலத்தூரான் ஆகியோருடைய குதிரைகள் நான்கு அம்மனை நோக்கியுள்ளன. அம்மன் கோவிலில் அம்மன் வடக்கு நோக்கி அமர்ந்துள்ளது. கோவில் வடக்கு வாயில் கிழபுறம் அத்தாயி கோவில் உள்ளது. விழியன் குலத்தில் பிறந்து திருமணம் செய்து கொள்ளமால் அம்மனுக்கு இறைபணி செய்த பெண்மணியின் பெயரே "அத்தாயி"ஆகும். அத்தனூர் அம்மன் கோவிலின் வடக்கு வாசலுக்கு எதிரில் முத்தி அடைந்தார் பின்னர் அத்தனூர் அம்மன் கோவிலுக்கு வெளியே வடக்கு வாயிலுக்கு வலதுபுரம் தனியாக அத்தாயிக்கு ஆலயம் விழியன் குலத்தரால் கட்டபட்டது. இவருடைய கோவில் முன்தான் தேர்த்திருவிழாவின் போது 3 எருமை கிடா வடக்கு வாசலுக்கு எதிரில் பத்ரகாளியம்மனுக்கு பலியிடப்பட்டு தேர் நிலைநிறுத்தப்படும்.